Kosa i lé l’aye ? L’aye sé in papiyon la nuite. Akoz i anparl son divé ? Pars demoun i kroi lo l’éspès poud nana dsi papiyon la nuit i fé pèrd lo kapasité d’ lo zyé. Lé pétète in pé for, mé tan pti nou téi kroi.

Astèr lo provèrb vi k’i paré sé in n’afèr konmsa. Sa i vé dir in moun i oi pa klèr : pa arienk avèk lo zyé mé li départaz pa lo vré avèk lo fo, li pé fé roul ali dann la farine. I di sa souvan kan in moun i èm in n’ot ziska pi oir kisoi lo défo, kisoi son prop z’intéré.

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké, rant-rant, ni pé z’ète, tazantan, d’akor rantre nou.