Néna d’ote an kontrèr, i koz pa konmsi zot filé lé pa koupé-an parlan konmsi lo moune sé in martin.. Défoi mèm ou lé a dmandé si bondyé la done azot la parol.

Lé vré sé solon bann sirkonstanss épi limèr ou lé d’dan .Défoi wi koz bonpé, défoi wi koz pa.Konm kréol i di : « ou lé konm martin ki kouzi ! » pars i paré- mi vann azot konm mwin l’ashté-si wi pran in martin i koz déza, é wi koude ali par l’aryèr, mi koné pa poukoué-pé sfèr lo mank d’èr !-lo zoizo i koz pi.

Kan i di d’in moune li la rèss konm martin ki kouzi, sa i vé dir li la pa di arien.Li la pa réponn –li la pa défann son ka par pèr, par la krintiv, pou pa di dé shoz initil ? mi koné pa tro mé mi koné sa i ariv tazantan.

Alé ! Mi kite azot rofléshi é ni retrouv pli dvan, sipétadyé.

Justin