Oté

« Li la rèss konm martin ki kouzi ! »

In kozman pou la rout

Justin / 29 novanm 2019

JPEG - 43.6 ko

Madam, Mésyé, La sosyété koz èk moin sé koz èk in kouyon-sé o pyé d’lo mir k’i oi lo mason. M’a dir azot, fransh vérité, sa sé in drol de kozman-sa. Mi di pa li égzis pa, an kontrèr li égzis mé koman li la fé pou z’ète la, kisa la fé in mové manipilasyon konmsa ? Mé zami, zot i koné bann marmaye-la sa néna d’zidé oui sa ! Mi ansouvien in marmaye la trap in zoizo a la kol épi li la boush lo zyé. Aprésa li la larg lo zoizo : mi rapèl pi si lété in srin, in kardinal, in bélyé. An touléka téi n zoizo é kan la larg lo pov zoizo li la monté droit dann syèl li la mont o mèm épi momandoné li la tonm an mass ! Paf ! dsi la tèr ! Mor ! Mortibis krévatis èst !. Mé nout kozman an-o la, i lé pa konmsa san pour san pé sfèr in pé la déza koud la fèss zoizo. Pé sfèr ! Mé lo kozman i vé ké ou i di sa, pou in moun, kan li gingn pi kozé éli rèss kon m i di an-o la. Alé ! mi kite azot rofléshi la dsi é ni artrouv pli d’van. Sipétadyé !