Nana in moun lé kandida pou l’zéléksion prézidan la répïblik. Na dé foi, konm di kréol, lï "raisonne" konm in tanbour. Li sort kalité bann téori, i vo bien sak mon bann kamarad, sak la pa invant zèf bouyi, lavé trouv pou ésplik shikoungounia : zot i koné zistoir "lë mor dann bato", sansa "in pti moustik konm sa, i pë pa donn in gran maladi konmsa !".

Donkalor, lë moun i apèl Sarkozy, i poz alï gran-gran késtion konm sak i suiv : Bann moun i suisid-la, sré t’i pa zot noré dann zot san-zot jène-in nafèr i pouss azot pou suisidé ? Bann moun i zafèr bann ti-marmay, zot galman, noré poin in mové zafèr dann san ?

Antansion, bann zidé konm sa, sa i pë amèn fé gro-gro bétiz : par égzanp, di konmsa, i fo karsèr bann moun i pouré èt pédofil mem si zot la pankor fé arien. Par égzanp androg bann moun i pouré suisidé. Li di pa sa, mé in bann koko gaté (sa na plin sou l’pyé !), i pouré majine ninport kossa.

I prétan dir, lavé in diktatèr dann l’almagn, na in bon koup de tan, lavé majine la tèr, té in gro boul épï lë mond téi viv anndan. Mi di pa zot lë rès, mé mi majine zot i koné.
Donkalor sré t’i, li lé..., sré t’i, li pran anou pou... sansa, lë dë, mon jénéral.

Justin