Mézami zot i koné kréol-la souvan défoi sa i koze an parabol é kan wi panss li di kékshoze, alé oir li di in n’ote afèr.

Mwin la touzour antande kozman mwin la mark an-o la é mwin la touzour pran sa promyé dogré. Pars lo promyé dégré lé fassil éspliké sirtou dann pti kozman mi sorte marké : si ou na pi l’dan, lé difissil manze graton. Mé néna inn-dé zour, mwin té apré lir-lir somi-lo mo Daniel la ékrir é toudinkou mwin la bite dossi in lésplikassion mwin té i atande pa. I parétré sa i vé dire lo moune lé inpuissan, sé pou sa k’i fo touzour bien majine lo késtyonn d’parabol. Sa la fé panss amwin k’in zour mwin la antande dann in boutik in moune apré diin n’ote : « Ou napi lo dan pou manze kann ! » é aprésa la pète in bataye dan la boutik mèm é sa la fé panss amwin lo boug l’avé di in parol té pa konvnab. Konm zot i oi koze an parabol-la, sa in n’afèr danzéré sa.

An touléka, mi lèss azot dékodé si néna pou dékodé é ni artrouv pli d’van. Sipétadyé.