Mézami mi koné pa si zot i koné kozman-la, mwin pèrsonèlman mwin la zamé antann ali sof mwin la lir sa dann bann léksik épi dann somi lo mo, i liv Daniel Honoré… Alor kossa sa i vé dir ? Mi di pa zot mé zot, bann léktèr Témoignages zot lé si tèlman informé dsi la lang kréol, son bann tournir épi souzantandi, mi pèrde pa lo tan pou ésplike azot sa.

La vi lé konmsa : gran matin wi marsh dsi kate pate, onzèr wi marsh dsi dë, épi lo soir dsi troi é kan l’ariv lo soir lo tan bann zannui, lo tan bann tablatir i ariv é kan sa i ariv la bransh i kass koté li lé faye. Oute vèrdir i éfass é dé oute plézir d’amour i rèss solman in vyé souvnir.

Alé ! Mi kite azot rofléshi la dsi é pétète souplègn azot dsi zot sor é ni rotrouv pli d’van, sipétadyé.

Justin