Zistoir-la, sa in zistoir vré. Zistoir in marmay disèt-an, in ga té i apèl Trayvon Martin, zistoir in bononm i apèl Zimmermann, in vizil bénévol, donk in pèrsone té i pans son dovoir té i mète ali dan lobligasyon fé règn lord. Sa i éspas dan l’Amérik, so gran péi démokratik konm Pierre Perret i di dan in shanson.

In nuite, Zimmermann l’apré é son ronn, in pistolé sanm li. Trayvon, son koté, i sava oir in pé son momon... li tourn li vir é, momandoné, li rant dan lantouraj in kour. Zimmermann i pist ali. Na in ralé pousé épi lo jènn marmay i bate lo vijil bénévol atèr. Momandoné, kan lo marmay i sar pran favèr dsi l’ot, sète-la i trap son pistolé épi li tyé lo marmay... Kosa i ariv par la suit ? La zistis i fé pa arien lo Zimmermann pars i pans li lé dan son droi, mé demoun i manifès. Mèm lo Prézidan Obama i di, Trayvon nar pi ète son garson. Donk i déside fé pas lo mèrtriyé an prosé. Prosé i pas. Ziri i diskit pandan sèz èr d’tan épi i déside lo vijil bénévol té an l’Éta lézitim défans... Ankor in détay, lo vijil té blan, lo marmay té noir, mé i paré sé pa in késtyonn rasism mèm si solon la prézidante tribinal, lo rasism té i rant an lign do kont dan léspri lo vijil. Donk na poinn rasism la dan ! A s’ki paré...

Ala kosa in fam do loi la di : èl la sign désizyon lo ziri, pars d’apré èl, Trayvon l’avé lo profil pou ète in délinkan, épi konm demoun i èm bien port lé z’arm — sa sé in droi dan l’Amérik ! —, i fo konète si la ansèrv lé zarm konm i fo, kan i fo. Donk kan ou i tyé in moun, i fo ou i kalkil bien si ou i doi tyé ali pou vréman. Si ou lé sir de ou, é si ou lé dnn lobligasyon, l’èr-la ou i pé ansèrv lé zarm. Apré èl la di, lo boug va rann ali son kosyon épi va tir son braslé éléktronik.

I paré la famiy lo vijil bénévol té i sot avèk kontantman kan la ziz la di avèk Zimmermann li na pi arien pou fèr dann tribinal... Apré tou, Trayvon Martin n’avé lo profil pou vni in délinkan !

NB : Sa in n’afèr i doi fé réfléshi anou. Pou kosa ? Pars dan désèrtin radyo, i lès désèrtin moun kozé. Zot i anparl bann jènn konm délinkan, zot i di, si i rant dan zot kour, zot i mète sa in kalib, é in bonpé d’moun lé dakor èk sa i di, zot osi zot nora pas lo boug in kalib, sansa in gran kouto. Zot i pans pa i fo pa ankouraj in n’afèr konm sa, mé konm di lo kont, lé posib moin l’apré fé mon prédikasyon dann dézèr. Ni artrouv ! D’isi la, na ankor in bonpé kozman pou pas dann radyo, épi tazantan, in Trayvon Martin va tonbé dan l’Amérik, épi dan d’ot zandroi. Pétète mèm isi shé nou.

Justin