Kisa noré pi majiné La Rényon té apré fons tèt béssé dann malizé konmsa ? Désèrtin té i di, mé moin lé a dmandé si zot mèm téi kroi pou vréman sak zot té i di, sansa té pou donn solman manjé la lang. Touléka,bann gran zournal épi bann télé, bann fézèr l’opinyon la zamé pran o sèryé bann l’avèrtisman. La prèv, zot té i mank pa dir lo parti kominis i pass son tan pou anons la katastrof. Paul Vergès té pli vizé ké lé zot, konm dabitid… Pass la dsi, mé zordi, l’èrk tout bann klignotan lé dann rouj, l’èrk lo dézéspoir l’apré kapar la mazorité d’moun kosa zot i sava trouv ankor konm pomad pou andor lo boubou ? Pou anéstézyé ali ? Z’ot mazinasyon lé for pou sa.

Yèr soir, pou rant mon kaz,moin té apré fé in slalome rant bann déshé fané par isi par laba. Moin té apré domandé si in kamion déshé l’avé pa bène dann shomin par érèr… Poitan vi lo nonm polis l’avé, té fasil Pou konprann lété pa... Lété in maniféstasyon an plis. Bann manifèstasion k’i arète pa dopi ké mésyé Fransoi la vni fé la provokasion La Rényon, dopi ké pou nout péi osi li la mète ali dann kan lo non-dévlopman, dopi ké lo sèl rouvèrtir ké li la propoz bann shomèr sé in l’anploi prékèr- la lang la poin lo zo !-, in zanr z’afèr ou i rant dodan épi momandoné ou i oi shomin i arète d’in kou dovan ou. In l’inpas si zot i vé !.. Par l’fèt, mi sort lir dann nout zournal in sindikalis i di donn toujour karant mil ti kontra an aspéran ké dann troizan bann jenn va gingn in travay dirab...Kèl travay dirab si lo péi i dévlop pa ?

Moin, pèrsonèl, mi pans na poin in rouvèrtir si na poin in dévlopman pou nout péi. Dévlopman ? Sa la pa in mo, sa in réalité, no téi sar toush avèk nout doi, nou téi sar rant anndan kan dann l’ané 2010, bann sosyalis la donn la réjyon Didier Robert... Tram trin, rout litoral, mcur, l’otonomi énèrjétik, lotosifizans alimantèr, la kopérasion réjyonal… Tousa la lété an marsh é lo parti sosyalis la done la min pou kasé. Mé lo bann l’idé lé pa mor ! Konm di lo kont, lo grin i domann arienk pou jèrmé, lo plant i domann arienk pou pousé, li san pi son kor sou la paye.

NB in lésprésyon pou la rout. "li san pi son kor". Sa i di kan ou na plin lénèrzi dann out kor. Lo kor i domann pou kasé ! Ou i koné pi out limit. L’instin konsèrvasyon mèm i zoué pi son rol. Sé pi la tèt k’i komann sé lo kouran k’i pass dan ou… Mi sort rouv lo liv Daniel Honoré "somi lo mo" é moin l atrouv plis dé paz dsi lo mo "kor". Sé dir si na zafèr poudi la dsi. Donk, mi éstop tèrla, mi domann azot fé travay zot koko la dsi. La matyèr griz i domann arienk pou rant an révolisyon.