Sa sé in kozman pou dir la pèrsone i rès loin. I pé dir osi, « i sort l’ilèt pandiyé » sinonsa « i sort dann dyab bouyi »… Sa i vé dir la pèrsone i rès loin mé pa solman. Déyèr solèy ? Sa i vé dir i fé noir donk lo moun lé pa tro ékléré konm k’i diré lé pa tro sivilizé. Shakinn son poinn-vizé la dsi ! Pou moin, in sivilizasyion sé in sivilizasyon, inn i vo l’ote. Mi oi pa moin apré démaye lakèl lé pli valab… Sof mi pans lo pli valab sé sak i mète vréman lo moun dann milyé son okipasyon. Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir, ké rant-rant, nou lé tazantan dakor rantre nou.