Sak mi vé rodir zordi sé ké si in parti konm la n’ote lo PCR i vanj pou la libérassion nout péi épi nout pèp li vanj pou son libérassion global avèk son koté ékonomik, sossyal, kiltirèl donk son libérassion konm pèp dann in linité zéografik ni apèl a Rényon.

La libérassion i doizète sossyal donk bazé dsi l’égalité é ni koné pou nout pèp sa sé in valèr inportan sé pou sa nout parti la vréman sobate pou l’égalité sossyal. La mète lontan pou gingn sak nou la gagné mé pti lanp-pti lanp nout pèp la bien progréssé ladan.

La libérassion i doizète kiltirèl pars san kiltir na pwin d’pèp, donk na pwin pèrsone pou rovandik nout lidantité. Paul Vergès la di anou nou lé rényoné, nout pèp sé lo pèp rényoné é sé konmsa ké nou l’ariv a rovandik nout lidantité rényonèz.

La libérassion i doizète galman ékonomik é sé dsi so plan-la ké ziska zordi nou lé maltrété par in réjime ni pé apèl néo-kolonyal-in nouvo kolonyalism — pars fransh vérité nou lé anpèshé d’libèr anou ékonomikman… Donk par l’fète ziska zordi nou la pankor trape nout libérassion global.

Sak mi di la zordi pou mwin sé kékshoz inportan pars sé l’amontraz-dizon l’ansègnman — prinssipal nout parti kominiss rényoné pou in libérassion global nout péi épi nout pèp.

A bon antandèr salu !

Justin