Ankor in madam assassiné par son bononm, in boug téi sort tir kèk z’ané la zol pou kou èk bléssir dsi la pèrsone lo madam. Pou bone konduite, lavé larg ali in pé avan son tan.

Alor, demoun i di, lavé moiyin si, lavé moiyin la... Oté ! Kozé lé bon, konmsa in pé dmoun an kolèr i défoul ; in pé i mazine tout sort mové tik-tak, i mète azot la plas bann moun i fé la loi... Mé koman noré fé pou konète so boug-la lavé sèr la haine dann son kèr pandan toussa d’tan, bien kashyète sa, pa di arien pèrsonn, konmsa lo bann ziz la libèr ali an kondisyonèl, i konpran pa zot nana dovan zot in mashine pou tyé !
Pou boug-la, madam-la té a li, konm in zafèr pèrsone lavé poin lo droi mète la min d’si, mèm port lo zyé dsi pou toultan. Alor, li la mazine pou guéri spès kansèr, spès bébéte i tourn, i artourn dann son tète, lavé arienk in solisyon : tyé, tyé tout ! Tyé lo madam pou détrui lo bébète l’apré manz ali par ann dan.

Sa i vien konmsa, in zour, kan i èm pi, kan dann kèr in moun la haine i ranplas l’amour. Sa i vien galman akoz, dann nout sosyété la libèrté in fanm lé konm in krime pou grokèr lo zonm.

Justin