Matante Zélida la ékrir Justin :

Mon shèr nové, mon spès salté, rouj-de-fon dovan l’éternité,
Na in n’afèr mi pé dir aou, dsi La Frans épi dsi nou mèm épi ankor dsi la libèrté. Fransh vérité, mi pé dir aou, Isi La Rényon nou sé in kartyé d’ libèrté. Kan mi konpar nout sityasion avèk sète d’ot péi, é bin mi pé dir aou moin lé kontan d’ète fransé, mèm si, konm mi oi, na in pé i anprofite la sityasion épi i bénéfisyé d’in libèrté zot i mérite mèm pa. I fé riyin, sak i kont sé la libèrté ni bénéfisyé an zénéral. Moin sar pa asé kriyèl pou rapèl aou, bann rouj-de-fon, na poin si lontan ké sa, téi vé krash dsi la libèrté, pars zot téi vé kas lo gatir i rotien anou avèk La frans. Tan my zot la gingn zot gouté é bann bon fransé la ranporté. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr,
Mi pé dir aou ou na in pé rézon é ou na in bonpé tor. Pou kosa mi di sa ? Matant, ou la fine obliyé lo tan La Frans la roganiz la frod zéléksyon isi ? Ou la fine obliyé kan nèrvis, kass an fèr, épi tout sort kalité la polis té i fé la vyolans épi la réprésyon. La pa pou sa d’apré ou zordi ankor nana in bonpé kréol nana la pèr dann kèr ? Ou i souvien pa Paul Vergès la fé vinn-sèt moi la klandéstinité pou konbat la réprésyon ? Ou i souvien pa ? M’a dir aou fransh vérité listoir va rokonète sak ni doi gran bononm-la ? Son l’intansion lété touzour pou élarzi léspas la libèrté ké diminyé… mi pé dir aou... Lé vré nout ka lé méyèr, zordi ké lo ka in bonpé péi, mé konm di lo kont la pa donn anou vréman sa, nou té blizé vanjé pou an avoir, zour pou zour, pyé a pyé,in bann zané, dsi plizyèr zénérasyon.

Mé, mi asir aou matant zordi nout libèrté é nout dignité lé an danzé. Pou kosa ? Pars nana déssèrtin mèr, zordi ankor, épi désèrtin sèrvis, san konté bann magouyèr tout kalité, i kraz la dignité bann rényoné. In sinp légzanp, vi ké nou lé dann pèryod zéléksyon : konbien d’ moun lé blijé donn zot kour pou rényon, pars lo mèr la désidé. Sak mi di la pa in mantri, mé in vérité. Kan ou la poin lindépandans ékonomik, lé dir pou di, mé ou lé pa dann in péi libèrté, ou lé pa non pli dann in péi la dignité. Ou i vé, ou i vé pa, mé lé konmsa é pa otroman ! Tok, pran sa pou ou !

Justin

NB Zis in pti zistoir : na in mèr La Rényon, la bril la paye sanm son l’adzoin. Donk son l’adzoin la di li prézant pi zéléksyon dsi lo lis ofisyèl lo mèr. Bon pou sa mèm ! Sof ké lo mèr la vni fé in rényon la kaz la famiy lo ladzoin é son vyé papa konm lo vyé momon la pa gingn rofizé, L’amèrtime dann kèr, la tristès osi, la ont pétète in pé. Libèrté ? mi ékr ton nom, mi kriy ton nom, mé kisa i antann amoin ankor bien zordi ?