Dopi k’la fé bann rézion dan la Frans demoun la romark in n’afèr : bann réjion sak nana in for lidantité la dévlop pli vite par raport d’ot kalité réjion la mète an plas konm l’arivé : nana plizièr lidantité may-mayé, plizièr provins may-mayé...

Mé mi sar pa koz pou zot : shakinn i koné son n’afèr. Moin pou mon par, mi pé pa koz a la plas lé z’ot, mète mon kiyèr sal dann kari i kui pa pou moin. Mi pé solman di sak mi kroi lé vré pou bann rénioné.

Nou nana in for lidantité, sa lé sir é pa arienk dépi zordi. Dann nout listoir, in pé téi di, issi nana demoun lé patriot nasional épi galman patriot kolonial : sa i vé pa dir zot lé pou kontinié avèk lo kolonialism, zot lété mèm kont bébète-la, mé zot té i sousié bien lo zintéré nout péi.

Zordi mèm, kissa la ankor ont di li lé rénioné ? Kissa na poin dann son tèt épi dann son kèr lamour pou son péi ? Moin, pèrsonèl, mi kroi pa nana in bonpé. Alors, sa sé in fors pou nou dann nout dévlopman, sa mèm promié poto nout dévlopman dirab, poto mitan nout dévlopman.

Justin