Mi domann amoin si zot i koné lantropriz oussa travayèr i pran pa zamé konzé ? Mi antan d’issi in pé i rir an misouk. Nana k’i pans si sé in plézantri, i pé s’an passé. Mèm in pé i doi mazine moin l’apré sèy pinn azot : « Moun vilin na ankor, moun kouyon na pi ! ».
Poitan !
Poitan, nana é plis ké ni pans bann travayèr dann pti-pti lantropriz i sava pa zamé an konzé sof in zourné loin-an-loin. Antansion, la pa dann lantropriz l’antikité ? Non, dann lantropriz nana bon-bon matérièl, lordinatèr, komann élétronik, in bon prodiktivité... La pa non pli bann travayèr l’antikité ? Sak nana plis soisantan... arienk an dimansh ? Non va, bann salarié ankor jènn.
Akoz, kan ou nana zanfan pou grandi, krédi la bank, la pèr pèrd out boulo... épi kan out patron i di aou li na gran bézoin aou, ou tousèl lé konsiansié, sé ou k’i koné bien amène la mashine... épi li va rékonpans aou. Alor, ou i mète la fatig in koté, out lanvi viv in pé galman. Mèm si dann out kèr, ou i di madam Desbassyns lé ankor vivan.
Konm out patron i koné aou bien ! Konm li koné bien moush i ral pa sanm vinèg ! A oui ! Lièv i koné son zèrb. Fransh vérité !

Justin