Mi pans mèm, an parmi sak moin la vi alé, désèrtin l’avé in bèrtèl konésanss bazé dsi in bèrtèl léspèryans é kan zot i sava l’ot koté d’la vi, inn i koné in brib sak lo défin téi koné, l’ot in brib é boudikont lo bann défin i lèss pa granshoz. In bèl paké d’boi ta kan sa i bril, i rèss arienk in pti paké la sand.

In zour moin la antann Paul Vèrgès apré di , dann la MCUR, i fo rouv in grann sal, tèl fasson ké lo moun i mète dann dossyé, son vi, son rékfléksyon, son léspèryans, épi d’ot zafèr ankor lé pli invizib dsi zot konm lo bann pti pulsyon zot la gingn in momandoné, konm d’ot shoz ni pé anparlé. Lété tro zoli, é l’ignoran la pran son plass la pyétine son gayar projé. Tout bann kouyon la bate la min, san konprann konbien bibliotèk zot té apré brilé.

M’a dir azot in n’afèr pou apiye mon kozman : moin néna in granpèr lété amontrèr dann lékol primèr, lété mèm inpéktèr primèr in sèrtin tan ,shak lané mi pass dovann son tonb é shak lané mi poz amoin la késtiyon : kossa granpèr Labor la kité an partan.Labor lété son prénom, in prénom dann latin i vé dir travaye é son vi té in vi d’travaye.Mi koné lété in léspèss savan, mi koné li la fé avans bonpé zafèr, mé moin mi oi arienk in tonb avèk tiyo an fèr pou fé lo tour, avèk lo nom, lo prénom épi la date li lé éné, épi la date la mortalité . Mèm listoir son vi, mi koné pa ! Apré anparl amoin dovoir d’mémoir !

Alor, ni pé dir, désèrtin i lèss in bonpé zafèr é d’ot i lèss pa arien épi kontant anou d’sa, mé ni oi bien intéléktyèl man, néna kéksh z i klosh ladan é konm i di dann diksyonèr, sa la pa ditou gratifyan. Alé ! Mi donne azot pti son la ,an passan, an aspéran lo grène moin l’apré somé i tonm dann bon tèr é pa dsi galé blé.l Ni rotrouv é si l’idé i vien azot, ni anparl.