Matante Zélida la ékrir Justin :

- Mon shèr nové, mon spès salté,
I falé moin té i di aou sa, pars moin lé sir i sava rann aou bandé. Ou i koné, mèm si mi arès loin, i gingn antann la radyo dann mon pti kartyé. Donk, moin té apré ékouté, san tro ékouté, kan moin la antann in moun la di konmsa : « La sityasyon lé grav La Rényon : nana de moun mizèr plizanplis… é la Réjyon la trouv konm sèl solisyon, fé in mézonn sivilizasyon ! ».
La moin la ri la ! La moin la pans bann rouj-de-fon pars sa in boi sa ! Dizon in boi pointi... La z’ot figuir la asiz-la ! Alé, pran sa pou toi !

Justin la fé pou répons :

- Mon vyé matant-touzour-dan-lérèr,
In bétiz, sa i pé fé rir, mé sa i anpèsh pa trouv la vérité pou sak i vé !
Matant, la MCUR-la, sa i sa donn demoun travay : a komansé, pou fé lo batiman, épi pou fé fonksyone lo zafèr konm k’i fo. Aprésa, touris va vni, é touris, sa i amènn larzan. Larzan sa i done travay Kréol...
Matante, ransègn aou in pé : la MCUR sar pa aryink in mizé ; nora réstoran la-dan, va donn éspéktak la-dan, nora lékspozisyon, bann zélèv, bann zétidyan, bann profèsèr va vnir aprann tèrla ; mèm demoun va vni an piknik dan la kour. A ! Matant, moin lé sir ou va èm sa !
Par l’fèt, si sak le moun la di dann radyo lété in kasaz lé kui kont bann kritikèr la MCUR ? In sort limour dézyèm dégré ? Ou i kroi pa ? Poitan, kalkil aou byin !

Justin