Maurice néna in lim nassyonal : son tit, mother land é son bann parol sé in gran fonnkézèr lil Maurice-Jean Georges Prosper — la konpoz ali apré in konkour roganizé pou sa l’ané 1968. La mizik sé Philippe Gentil la fé.

Si mi di azot mi yèm bann zimn nassyonal sirésèrtin bonpé d’moune i apréssyéra pa — mèm in zour in bon kamarad la di amwin li yèm pa sa pars sé kékshoz i diviz limanité. Poitan mi yèm bien toute bann zimn sak i toush aou dann kèr é par l’fète sé limn nout bann frèr é sèr lil Moris ébin sa i toush amwin ankor pliss.

M’a dir sa i toush amwin ankor pliss pars lindépandanss nout voizine sé in lindépandanss réissi.. Mi rapèl, néna déza in bon boute tan, dann in konféranss de press, in zoinaliss la di avèk Paul Vergès si li narté kontan La Rényon té konm Maurice, mi panss pa si li lété kontan lo réponss nout kamarade la fé ali, pars Paul la di banna i pé ète fyèr pou lo péi zot la fé — donk pou in lindépandanss réissi.

D’apré sak mwin la vi bann morissien lé fyèr zot péi é sa sé in bon poin pou zot. Mi oi kan i débate d’in késtyon inportan pou maurice sé bann morisien néna la parol — ni pé pa dir la mèm shoz dsi La Rényon… Lé vré la kour internassyonal La Haye la reprosh langlétèr pou in dékolonizassion la pankor abouti san pour san é la kour téi parl lé chagos. Mé mi panss zot lindépandanss bann morisien i konstrui sa ofiramézir.

Pèrsonèlman mi souète banna pliss réissite ankor dan l’avnir. Pèrsonèlman mwin lé konrtan landroi zot la fine arivé é mwin lé sir zot v’alé pli loin é zot v’alé pli o… é mi panss sa i doi ankouraz anou dann shomin in dékolonizassion a réissir nou ossi.

A bon antandèr salu !

Justin