Li la di, sa i prouv sirman k’in bande rigolo dann tan lontan té apré dékoné avèk bande zarm déstriksyon, é fianal-de-kont l’ariv azot mèm shoze ké v’ariv anou dsi la tère si ni kontinyé fé lo bète konm nou l’apré fé dopi kék syèk déza, vi ké nou l’apré émite bande zékrivèr bande déssiné kan zot i monte zot sénario d’térèr.

L’èrla mwin la parti oir dsi linternet kék zinformassion dossi l’aktyalité éspassial é kossa mwin l’aprann, dé shoze fé pou épate in moune konm mwin. Inn L’amérik l détrui avèk in fizé k’i koute a popré 60 milyon d’dolar, in satéllite léspyon té apré tourn dann léspass, pou la po d’patate, mé avèk dan li in kantité karbiran bien danzéré pou l’imanité.

Aprésa mwin la antande in n’ote kouyoniss dsi bande déstriksyon bande vyé satélite, sète in satélite russ l’apré tourn dann léspass san bi, pou la po patate dopi 1980 si tèlman d’apré sak i di bande kosmonote la station internassional la gingn in vré kap-kap avèk la père zot éstassion té riskab déglingué dann léspass.

Mézami, mi rakonte azot sa konmsa, mé la pa bézoin zot i panik pars lo danzé ni viv dodan dopi tan é tan d’zané. Danzé lé partou, é anpliss li lé goumanté par la kouyoniss demoune. Konm in kamarade katéshiss téi di avèk nou lintélizanss lé bordé avèk la kouyonniss-landroi néna inn néna l’ote é inn i pé pa s’anpass l’ote. Sak i vé dire pou mwin, pli sinploman, lintélizanss épi la sazèss i manze pa dann mèm zassyète toulézour.