Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

« Lintélizanss lé borné sanm la kouyoniss » : Tro intélizan, la pa bon forséman !

mèrkrodi 24 novanm 2021, sanm Justin

Mézami, opliss mi viéyi an az, opliss mi avèye demoune, opliss mi antande azot sirtou pou sak i koze toultan la boush rouvèr, mi apèrssoi pou déssèrtin zot i fé konmsi zot lélé o dsu dé zot. Aryèr valtaye demoune orizinal l’arivé !.. Défoi i diré zot i koné toute zafère. Zot néna zot lopinyon dsi toute. La plipar d’tan sa sé in bande kozèr é konm morissien i di zot i koze pou anpèsh la boush pi. Zot i pran toute promyé dogré é souvan défoi lo kontropyé lo promyé dogré.

Kan zot néna pou manyé arienk lo bande lyé komin, zot néna linpréssion zot panssé lé orizinal é la poin pèrsone i trape ali an profondèr épi an klarté.. Parl pi si zot i koze dann la lang bande franssé é ou wi kontinyé manyé oute kréol oute famiye la lèss pou an éritaz. Wi diré zot é ou lé pa dann lo même dimanssion… Souvan dé foi zot i obliye la lang sé arienk in zoutiye é si wi pé manyé aèl, èl i done pa ou lo zéni.

Lo zéni, mézami, pars toute demoune d’inn sèrtène fasson, néna son zéni donk lo zéni lé dan ou, é sé aou d’ konète oussa li lé, an kossa li konsist é kossa li pé pèrmète aou dir, sansa fère. Mé antanssyon pa d’ète koté la plake :

Si wi fèrm la boush, demoune i pé panss ou sé in kouyon, wi koné pa rien, mé si wi rouv torantravère donk si é wi rouv tro, demoune na poin difikilté pou katalog aou é pou konprande ou lé pli kouyon ké zot i panssé.



Inn modékri, inn ti lavi, inn komantèr ?

signaler contenu


Facebook Twitter Linkedin Google plus