Mézami dann l’ané, bande zorganizassion internassyonal i invite anou pou fète in ta d’zour. Néna dé zour ni anparl mèm pa pars sanm pou nou la pa dé zour k’i mérite ni panss azot. Mé an parmi néna déssèrtin zour i vo vréman la pène pars zot i roprézante lo konba l’imanité pou késkshoz inportan vi ké sé lo konba pou ban de droi…

Samdi diss déssanb sète ané, la vil de Lyon la shoizi sink pèrsonalité pou mète azot konm sitoiyin d’onèr grande vil franssèz-la pou zot konba pou mète anlèr bande droi umin. An parmi bande moune-la néna Lisbiye Elizé in shagossiène ni koné bien, nou k’i milite pou la solidarité avè lo pèp shagossien é kan ni koné sak èl la fé, ni pé di arienk in n’afèr, dékorassion-la sa lé mérité pou vréman.

Pou kossa sa lé mérité ?

Dann son liv « La dernière colonie » lékrivin Philippe Sands i rakonte koman Lisbiye la partissipe lo prossé gouvernman morissien la fé Gouvernman bande zanglé dovan tribinal de La Haye. An parmi demoune l’a pass témoin, néna madame shagossiene-la k’i rakonte koman èl lété viktime la déportassion é ala sak Philippe Sands i rakonte é sa la spass dovan tribinal la Haye an plin dann in prossé :

« Astèr la vni lo tour Madam Elizé. Vintan dsu Perhos Banos, kat zour légzil forssé. Karante sink zané konm réfizyé épi toussala konsantré dann in déklarassion la dir solman troi minite épi karante sink sogonde. »… « Kan madame Elizé té fini fé son témoignaz, in gran silanss ossi for ké bande parol la pèze dsi lassanblé, épi aprésa pézapé demoune la komans antande lo brui bande larm. Bande ziz la ékoute sa, épi bande ziz la antande sa é apré sink foi dizan lété pa étonan ké sa i dégaj in for l’émossion konmsa »

Philippe Sands an tan ké avoka la di sinploman : « Sa i konsèrne bande demoune réèl, bande vi réèl, bande fé réèl épi lo bande konsékans la réèlman éspassé dan lo tan » Mézami, sa sé sak l’avoka la di, mé sak nou la antande dann télé la fé dsi nou in gran linpréssion an mèm tan ké toute demoune dann prossé nou antande la voi l’Afrik, l’Afrik méprizé, l’Afrik déporté, l’Afrik viktime bande gran puissans soi-dizan i défande bande droi umin mé an réalité i kraz bann droi-la avè zot pyé.

Lisbiye ni pé dir aou zour ou la rozistre oute parol sinp pou pass dovan lo gran tribinal, zour-la ni pé dir aou, ou ossi ou la ékri inn paz listoir bannzil Shagoss. Ou ossi ou la ékri inn paz bande pèp méprizé, épi rozété dann lo monde. In pé par ou Lisbiye bande shagossien va rotrouv zot droi rotourn shé zot, é lo droi rékipère zot dignité.

Franshman Lisbiye wi mérite bien la dékorassion la vil de Lyon la done aou.

A bon antandèr-salu.

Justin