In roprézantasyon dann troi D par bann modélis

Si bann z’ékspèr la nyabou trouv in n’afèr konmsa sé par raport : la kalité lo l’ADN bien konsèrvé épi in nouvo téknik pou sékans sak i apèl lo jénome la mète o poin sé dèrnyé tan. In shèrshèze i apèl Selina Brace, èl mèm la pèrs in trou koté la tanp Cheddar Man pou trap la matyèr nésésèr pou fé in bon l’analiz l’ADN.

Lo léskélète lété dann in grote é lo tan té a popré parèy dopi détan é dé tan. Donk l’ADN la pa dégrédé. Avèk lo bann z’informasyon bann savan la trouv la-dan épi in skanèr lo krane tout antyé, la nyabou fé in modèl dann troi dimansyon pou tash moiyin trouvé kisa i boug té i rosanm.-kisa so l’ansète bann z’anglé téi rosanm.

In drol do konbinézon

Cheddar Man té i fé parti in popilasyon bann shasèr-péshèr f téi sort dann moiyin-oryan pou ariv ziska dann l’anglétèr an pasan par l’érop di nord si la finisyon lo dèrnyé pèryod glasyèr. Zordi, i pé dir, néna dsan pour san lapopilasyon bann blan GB i désann so bann moun la épi i pé konsidèr Cheddar Man konm in z’ansète azot.

Son l’éskélète lé zordi éspozé dann mizé listoir bnatirèl la vil dé londres. In zournal bann z’anglé The indépendant la koz avèk in sèrtinIann Bames, in diréktèr la roshèrch é la pèrsone la di.

Sanm pou moin, la pa arienk la késtyonn po lé intérésan. Sak i poz amoin késtyon sé lo drol konbinézon i donn lo ga in l’aparans ni pé pi ir dsi pèrsone zordi. La pa solman la po noir épi lo zyé blé, mé galman la form son fiigir. Sanm pou moin, zordi lé pa posib kroiz in moun konmsa kék par dsi la tèr… Chris Stinger pou son par i di toulmoun i koén néna d’moun dopi o moins in milyon z’ané dann GB mé dopi lo dèrnyé glasiasyon sé lo sèl éskélète in moun konmsa la fine trouvé.

Bann nouvo manyèr manzé

Pou asplik koman la po la shanj koulèr épi la vni pli klèr in shèrchèr i trouv dé l’ésplikasyon :

Bann po klèr l’ariv dopi dis mil zané a popré pars pèryod-la demoun la lans a fon dann l’agrikiltir. Donk lo réjime manjé la shanjé é la vni pli pov késtyon vitamine D... Sa i vé pa dir Cheddar li mèm épi son bann kolèg la invant l’agrikiltir, mé d’ot moun l’ariv par kantité épi zot té i métriz l’agrikiltir donk la shanj lo réjime manjé, tèl fason la po bann demoun la vni plizanpli klèr.

Solon bann savan, demoun i pans z’ot zansète l’avé mèm koulèr ké zot é sa sé in n’afèr la pa vré san pour san é mèm zot lété pa parèye ditou avèk in patrimoine zénétik lété pa parèye la z’ot.

(dézyèm morso la fini)