- Promyé morso.

Moin lé sir in pé lé riskab domann pou kosa mi parl in n’afèr konmsa. Pars, boudikont, i fé pa arien si bann zanglé blon l’avé in z’ansète noir. Kosa i fé si bann promyé z’om i sort l’Afrik épi la parti partou dsi tout la tèr, pou pèpl lo mond antyé… Sa i fé azot in n’afèr sa ? Sa i fé pa zot arien ! Bin alor pou kosa i anparl de sa ? Pou tourn lo kou in sistèm i diviz l’imanité an ras. Alé oir néna arienk in ras, sé la ras imène.

Demoun rasis, la ras la pan kor étinn

Si lé konmsa, la pa initil an parlé, sanm pou moin. Anon pa obliy kant mèm dsi bann éstad fotbal in pé partou dann l’érop kan bann fotbalèr noir i zoué, in pé i émite lo kri bann babouin. Anon pa obliy kant mèm néna demoun rasis é pa arienk dann in péi, mé in pé partou. Mi diré mèm isi La Rényon lé ankor konmsa. Sé pou sa mi pans lé pli préférab rétabli in pé la vérité dsi lo lorijine l’om modèrn, dsi son l’épopé in pé partou dsi la tèr. I vo myé di, mé la pa pou sa in pé va shanj l’opinyon épi va vir z’ot kuti dsi la késtyonn ras. La kouyonis baro lé pa si také ké ni kroi é ni pé dir néna demon la-dan.

In portré moulé Cheddar Man

Donk zordi mi vé parl in ga téi apèl Cheddar Man, in zansète bann z’anglé. Antansyon la pa arienk koméla i koné boug-la pars néna dis mil z’ané aproshan,-dann l’èr la pyèr - li la viv dann l’anglétèr. In bann savan i sort donn ali in roprézantasyon : po noir, zyé blé, shové bouklé. Pou fé sa, la tiliz son l’ADN pars son l’éskélète lété ankor bien konsèrvé kan bann shèrchèr la trouv sa dann dann la valé La cheddar. Ala pou kosa i l’apèl ali Cheddar Man.

Mi pans z’ot travaye lé korèk

Solman antansyon, la pa promyèr foi i zoué avèk son l’ADN é néna kék z’ané bann z’ékspèr la étidyé l’ansète bann z’anglé, pou déklar li l’avé la po klèr épi lo zyé maron épi shové noir pars konm in savan z’anglé Chris Stringer, in diréktèr mizé ‘istoir natirèl i di : lé pa fasil pans in l’ansète bann z’anglé l’avé la po noir épi lo zyé blé. Sé pou sa mèm la donn ali lo zyé maron épi la po klèr, shové noir kant mèm... Mi préfèr pans lo roprézantasyon zordi lé korèk é i sa pa shanj ankor lo poinnvizé dann in pé d’tan. Mi voudré pa an avoir mont dsi l’do in mové shoval, mé mi pans sof pétète dann désèrtin détaye va trouv firamézir, z’ot afèr lé bon so foi isi.

(La panor fini)