Epecuen ? Sa té in gayar vil demoune téi sava pran lo bin épi trouv lamizman dann vakanss. Mé zordi i rèss arienk gro ta galé in pé partou. Alor lo zoinaliss i rakont kossa la éspassé na pwin lontan dann bann zané katrovin. Avansa dann l’ané 1920 banna, dann péi-la, la fé in sité pou d’moune amizé bien protézé avèk bann dig pars lo la mèr avèk lo lo flèv téi arète pa fé lo vativien dann landroi-la.

Pou komanssé pou bann rish, bann bourzoi épi bann zaristokrat. Apré la guèr 39-45 sé bann klass moityène la ranplass banna épi la transform landroi an gran sité ballnéèr. Mé problèm dann landroi-la delo i mont, delo i dsann ziska k’in zour lané 1985 lo la mèr épi lo lo flèv la rant firamézir dann la sité ziska ké l’moune i sov pou alé in n’ot koté é delo la kontinyé son maniganss épi la rokouvèr landroi. Konm i di dann télé in sité anglouti. Pi arien a oir, pi d’batiman vizib, pi d’pissine, pi d’monté-désann pou fé kriye demoune, pi d’zé pou marmaye. Pi d’klassqmoiyène, pi d’zanimo, in sèl zoizo tazantan i vien shate in pé dann landroi.

Lo vil la rèss par-la dizan sou d’lo épi lo la parti ofiramézir é lo vil la réaparète mé kassé, détrui, pi arien pou fé ziska zordi é pèrsone la artourn viv dann sité-la sof in gramoune katrovindizan i koné listoir landroi dopi A ziska Z… Wala lo zistoir zot i pé artrouv sa dann zot téléfone.

Mé akoz mi anparl azot sa ? Pa pou fé pèr, ni pou fé fèr bann maraye mové rèv, mé pars — sanm pou mwin-sa i anonss in pé bonpé landroi dsi la tèr, mèm pétète issi La Rényon avèk lo dérègloman klimatik é lo shoi maléré bann gran di mond la fé an proféran bann milyar bann rish plito ké lo bienète limanité.

A bon antandèr salu !

Justin