Biensir toute bann koléktivité lé pa kontan pars avèk la goumantassion lo pourssantaz pou zot lé riskab an avoir in gran diminission bann kontra PEC donk in rolanss pou lo shomaj issi La Rényon.. Biensir lo voiyan lanploi lé o rouz épi avèk lo shanjman i vienn avoir pli k’zamé voyan-la sar o rouz é zot i koné bien la kriz lanploi sé noute boubou anou rényoné-konm pou lézote téritoir loutre-mer.

Lo sitoiyin dann la ri li ossi li protèste konte sa mèm si bann moune-la lé pa tro vizib dann manifèstassion, mé kan zot i koz dann radio souvan défoi zot i di-avèk limour kréol-la bézoin noute larzan pou anvoye sa l’Ikrène. Biensir sa lé pa vré pars finalman sé plito larzan la Rissi volé : bann zintéré larzan La Rissi i ansèrv pou sa. Ni pé domandé toussala kossa sa va dovnir si domin la pé lé fé o profi d’la rissi…Nou néna ankor lo tan pou an parlé.

Mé mwin mi poz amwin késtyon dopi plizyèr zané dsi sète afèr d’kontra édé é mi domann amwin pou kossa lo bann shanjman i fé pa tro dézorde laba dan La franss épi i fé gro déga dann péi loutre-mèr é pou mwin la réponss lé sinp… Si lé konmsa sé pars La Franss sé in péi dévlopé ; in grann puissanss é bann téritoir l‘oute mèr i koné in mal dévlopman, in dévlopman san ki ni tète… Bann rényoné i arète pa dénonss sa dopi dé zané.

A bon antandèr salu !