Zot i rapèl listoir labolission lésklavaze. Shé nou la aboli dë foi, d’ote zandroi la aboli in foi. In promyé labolission lété dann l’ané 1794, apré Napoléon promyé la rétabli. Aprésa lo vré labolission l’ariv l’ané 1848 lo 20 déssanm.

Astèr alon oir in pé la départmantalizassion épi son laplikassion réèl : la loi lété adopté 19 mars 1946 é De Lépervanche la di, « sa in bon travaye kominist ». Mé oila légalité sossyal, la pa toute suite nou la gingn sa é nou la atande sa dé zané é dé zané ziska Mitterrand é mèm Chirac é sirtou la préssion noute parti épi son bande zélu.

Kissa i souvien pa lé démission Paul Vergès épi Elie Hoarau konm député ? Kissa i souvien pa lo zé pongn rante parti kominiss épi Chirac – l’égalité sossyal konte la parité ?

Koman va éspass pou la suite ? Ni koné pa ankor mé sak ni koné sé ké noute domande lotonomi i romonte l’ané 1959. Aprésa la fé la réjyonalizassion. A quand in vré réform itil épi éfikass pou pèrmète anou dékolonizé, épi trape nout vré dévlopman ?

Ni koné pa, mé sak lé sir sé ké nou va atande ankor in pé, mèm si noute demande réform lé bien fondé, é lé réalist boudikonte. Pétète nou va gingn nouvo konpétanss épizapré momandoné nou vaoir nou sar paré pou gingn noute majorité. Par la lite biensir pars néna arienk la lite k’i pèye..

Pou linstan mi diré nou la rate noute dékolonizassion mé nou lé paré pou réissi ali, pti lanp-ptoi lanp, gran bobèsh.