Mézami si ni artourn in pé dann tan, si ni arvien in pé an aryère, pa si tèlman lontan mé ziss assé pou rapèl anou lo konba kiltirèl nou mèm épi plizyèr zénérassion l’améné pou fé rokonète inn-dé zidé vré, inn-dé zidé sinp dsi noute listoir, dsi noute kiltir, dsi toute sak i fé ké nou sé nou é nou sé pa lé zot. Zordi mi panss ni pé dire bande négassyonist la bien rokilé, zot la pèrde plizyère bataye, mé pa toute… si ni rapèl koman zot la nyabou fé échoué lo prozé MCUR in prozé noré bien ansèrv lo pèp rényoné kansrti pou dézintoksik noute moral.

Antouléka, lété pa késtyon pou zot de fé rante listoir lésklavaz dann lékol, lo kolèze osinonsa lissé. Mi vé pa kriye viktoir pars listoir La Rényon la pankor toute la plass li mérite dann l’amontraz listoir mé kante in n’afèr i avanss i fo rokonète. Sé konmsa ké samdi aprémidi mwin la gingn lokazyon rogarde in lémission télé Archipèl téi porte dossi l’amontraz listoir dann kolèj é mi doi dire sa sé kékshoz la bien intérèss amwin.

Pou kossa ? Pars mwin pèrsonèl mwin la antande parl lésklavaz issi la Rényon-anparl sèryèzman – l’ané 1959 avèk la néssanss lo PCR-noute parti kominist – é son bande tèze dsi l’otonomi in dokiman pou roinprimé épi distribyé toute demoun si possib pars sa i fé parti noute listoir anou rényoné é i anparl korèktoman noute listoir… Si mwin la konète l’avé zésklav La Rényon, mwin lé sir in bonpé d’moune la gnore sa pandan lontan é pétète i koné l’afère ankor vagman.

Mézami, mi sava pa dire azot kossa l’avé dan l’émission-la, dabor pars mwin la poin la plass pou fé, épizapré pars si zot i vé zot i pé rogarde sa dsi lordinatère, é pétète roganiz séanss pou oir ansanm fime-la.. Mi koné in pé i doi trouv a kritiké mé mi pé dir azot, si mwin l’avé vi fime-la kan mwin lété dann la klass katriyème mi panss sa noré dézintoksik mon léspri é noré rouvèr mon ali dsi noute passé, é dsi noute réalité, dsi lo moune té otour d’mwin dann tan.

Mi panss sa noré fé d’bien amwin épi a mon bande kamarade lékol laz trèz-katorzan., nora pèrmète konbate bande zidé foss la polué mon léspri é sète plizyèr zénérassion. Mi anss sa noré fé avanss anou dann noute konba.