L’avé inn foi, pou inn bone foi, méssyé lo foi, la manz son foi avèk in grinn d’sèl.

Kan li la konète lir bien konmkifo épi ékrir galman, kontan d’li li la di li rotourn dann son vilaz. Lo vyé savan amontrèr la di ali, li pé rotourn shé li, si sak li la aprann i sifi pou li. Mé rotourn shé li, lé loin é lé pa si fasil ké sa fé toussa shomin a pyé mé li la fé a l’alé, li pé fé o rotour. Mé oila, anparmi lo bann marmaye son lékol l’avé in jéni, domi-moun, domi-léspri é la di ali, kaziman invizib pou in èye demoun. Lo marmaye jéni la di ali :

« Nou lé dalon nout dë ou.konm ou i rotourn dann out vilaz, m’a done aou in méssaz pou aporte pou mon paran é m’a transporte aou dann out vilaz pli vif ké léklèr. Ti koné pa kissa mi lé, mé mwin mi koné kissa ou lé pars aou avèk mwin nou lé né dann mèm landroi. Nou, bann jeni ni koné azot bann zimin, mé zot, bannzimin zot i koné pa nou, bann jéni, é si nou ni gingn oir azot, zot bann zimin zot gingn pa oir anou.. Kan ou sar fine ariv out landroi, mète la bag an arzan-la dsi out doi é ou va vnir abou oir bann jéni épi zot vilaz. Si wi tir sa dsi out doi, sansa si wi pèrd ali wi gingn ar pi oir bann jéni é nout vilaz va disparète konmsi li l’avé zamé égzisté. Astèr assiz dsi out tapi, fèrm out zyé é m’a transporte aou. Mamadou la bien akoute ali, li la bien fèrm son zyé, épi in pti guiguine lo tan li té fine ariv dann son vilaz konm si li lété dann in mazigador.

Landomin matin Mamadou la mète la bag dsi son doi é li la vi bann jéni, zot band kaz, toute zot laktivité é li la parti rand in vizite la famiy son kamarade é li la di azot :.
« Lo zéni zot paran i fé dir azot bonzour épi i di azot li kontinyé son zétide dann péi li la parti, in provinss péi Sénégal.
— La famiye la domand ali : « Oussa i lé nout zanfan ? pou kossa li lé pa la avèk ou ? »
— li la réponde : « zot zanfan la di li néna ankor in ta zafèr pou aprann avèk lo savan é kan li sar fine aprann in bonpé li va rotourn dann zot vilaz ».
— A ! lo bann paran la di, nout zanfan i aprann bien li va réissi dan la vi Mamadou akoz ou la pa rèss laba pou aprann bonpé zafèr. Mamadou la répond, téi falé mi rotourn mon vilaz mé pétète in zour m’a rotourné.
Mon zistoir la pankor fini-samdi proshin zot va lir la suite.