L’avé inn foi, pou inn bone foi, méssyé lo foi la manz son foi avèk in grinn-sèl.

Mamadou lété in travayèr é avèk d’ote dalon i la désside fé sak demoun téi panss téi fo fèr dann tan défrish la foré pou fé in plantaj. Li téi travaye matin o soir dopi avan olèye i lèv ziska la nuite i tonb. Son travaye téi avanss vite é son pti famiye lété bien kontan. Kant a son madam èl téi fé l’alé rotour rante son kaz é lo mond par issi, ziska la kaz son famiye konm mi di azot i rèss dann in n’ote dimanssyon. Tanzantan, èl téi okipe zanimo, épi èl téi fé lo zardin ; Toute i roul ron.

Kriké ! kraké ! Kriké Méssyé ! kraké Madam !

In zour, té in zour d’pa d’shanss. Lo bèf la kass la korde épi li la rode boir d’lo dann pui-so kouyon la ! - é li la tonb dodan. Mèm zour léopar la pass par la épi la manz lo pli zoli shèv zot l’avé... L’avé pi arien pou fèr : lo tan demoun i sava prévni Mamadou, lo bèf té fine toufé, é la pi trouv la trass léoparté fine alé kashyète dann boi. La momon Mamadou la antroprann lo marmaye, l’akab ali avèk in ta la romontranss. Lo marmaye té i trouv pa arien pou dir… Son madam té in pé an rotar m é ziss kan èl l’arivé èl la antann son bèl mèr apré dispité é an parmi lo bann roprosh èl téi di :
« Ala sak i ariv kan i maryé avèk in fanm Jéni. »

Ziss lo parol lo madam téi vé pa antann. El la pran sa konm in trayizon, son mari l’avé pa gingn tienbo son lang. Sito di sito fé, èl la rante dann la kaz épi èl la trap lo bag majik téi pèrmète son mari alé dann péi Jéni. San di arien, san fé oir aèl, èl la disparète... Mamadou vitman-vitman la kon prann sak la éspassé, mé arien a fèr, inpossib alé dann péi Jéni pou rotrouv son madam... Promèss sé dète é promèss fète i doi zète réspékté.
I paré Mamadou l’atand son madam lontan-lontan mé li la pi rovi aèl. Tanzantan sanm pou li èl téi rovien pars dé shoz dan la kaze l’avé déplassé, é son kaz konm son kour lété zamé sal. Tanzantan mèm son linz lété lavé é ropassé. Dann son kèr li la panss si son madam i fé sa in zour èl va rov nir. Mé èl la zamé rovni.

Mon zistoir lé fini. Zistoir Mamadou zanfan l’Afrik. Si zistoir lé vré, li lé vré, si zistoir lé mantèr la pa mwin l’otèr. Koton mayi i koul, rosh i flote. L’avé Inn foi pou inn bone foi méssyé lo foi la manz son foi avèk in grinnsèl.

La fini
Nb in zistoir ‘Afrik Georges Gauvin la mète an kréol.