Shak zour, shak ané, nou néna kamarade i sava l’ote koté d’la vi. Ni koné bien zot i par l’ot e koté d’la vi avèk bien ranfermé dann zot mémoir zot léspoir, zot soufranss, zot rézistanss pou fèr fass laparèye répréssion. Ni koné zot i par, mé ni koné galman na pwin pèrsone la pran la pène rakonte zot zavantir dann tan zot lété ankor vivan.

A biensir, vik lé pa ékri, vik lé pa rakonté dsi in sipor, mwin lé kaziman sirésèrtin na pwin la trass sa dann l’opinyon piblik nout péi La Rényon. Donk lantèrman in militan kominiss i doizète pou déssèrtin lantèrman in moune plisk’ordinèr, sète in moune la pa fé vréman listoir nout péi. Poitan mi yèmré bien k’i rakonte listoir toutebann zanonime la fé sak ni lé zordi dann nout pèrsonalité, dann nout rèv épi dann nout l’anvi.

Listoir bann dirijan mi sipoz sa i pé z’ète rékonstityé, sa i pé z’ète zakonté, é sa i pè ansèrv pou in méyèr konéssanss noute péi, son pèp, son bann lite, son kapassité d’rézistanss, mé an déor d’inn-dé dirizan, ziska zordi pèrsone la pa rakonte vréman listoir bann militan. Poitan sé zot la fé sak lo parti la fé, é sé zot k’i mérite galman zot vi i doizète rakonté.

Mé zot va dir amwin : pou kossa i fo rakonte toussala ? Pou kossa i fo rakonte la vi bann militan, la vi bann kominiss de baz ? Kossa i ansèrv fèr in n’afèr konmsa ?. ; In zour mwin la antann Paul Vergès an parl la MCUR é mi kroi mwin la antann ali dir dann la MCUR nora la plass pou toute bann moune la lité pou fèr ké lo pèp rényoné sé zordi lo pèp rényoné é kissa pliss ké bann kominiss rényoné la fassone nout mantalité d’rényoné, nout kapassité d’rényoné, épi la lite amèné kont laliénassion.

Mézami lé vré bonpé rant nou lé mor, mé lé vré nou la viv, lé vré momandoné shakinn rant nou la gingn dir non é sa la fé soufèr ali dann sa vi, dann son finanss, dann son santé. Bonpé rant nou la konète la prizon pou kékshoz téi mérite pliss la gloir ké d’ète blamé.. Zot i pans s pa sé dé shoz i mérite ni arète in néstan pou réflèshir, é pou anrishir la mémoir koléktiv nout pèp rényoné.

A bon antandèr salu.

Justin