Matant Zélida la ékrir Justin :
Mon shèr nové, mon spès salté, rouj-de-fon dopi létèrnité, moin lé a d’mandé pou kosa, toultan, bann rouj l’apré anparl bann z’afèr lontan olèrk parl z’afèr zordi-lo prézan par l’fète - épi sak v’ariv domin é pli loin-lo fitir par konsékan. Pars, sanm pou moin, sak i intérès l’imanité i doi pa z’ète lo pasé. Konm i di, lo pasé, sé lé pasé, mèm trépasé. Li lé fini. Ni pé pa armète ali dsi la tab pou fé vni ali pli zoli ké li lété. Sa la pa konm in paz barbouyé, ou i pinn ali an blan pou arfé zoli désin dési. Li lé définitivman konmsa é pa otroman. Tok ! Pran sa pou toi !

Justin la fé pou répons :
Mon vyé matant i koz solman la boush rouvèr, mi pé dir aou, définitivman, mi pé pa z’ète dakor avèk ou. Pars si mi konpran aou bien, i fo mète listoir par koté, pi fé in kont avèk li, pétète mèm i vo myé pa konète ali, pa étidyé ali, vèrs ali dann ba koté, é pétète mèm fé disparète ali. L’èrla, konm la natir néna orèr par raport lo vide, i sifi d’arfé in n’afèr pou pran son plas.
Par ébzanp, i pé siprime la fète l’abolisyon lésklavaz épi ranplas ali par la fète létchi. An mèm tan, tras in tré dsi lésklavaz li mèm épi dir li la pa égzisté. Fézan nout shomin fézan, ni pé mèm dir sak i apèl lésklavaz lété in vi an bone antant rant bann zésklav épi bann mètr.
I pé fé sa, mé sa sé pi listoir matant sa i apèl lo révizyonism.
I pé ankor dir l’angazis lété inn shans la ofèr bann moun déor pou gingn vnir travaye isi shé nou é si bann pov zangajé téi mète la kord laté pa par dépitasyon mé sinploman pars zot téi kroi zot nora artour viv éré dann zot péi.
I pé fé sa, i pé di sa, mé sa la pi listoirmatant sa i apèl sinploman lo révizyonism.
I pé di ankor an parlann bannzanfann la Kreuz, sa lété inn shans la shère é dous frans la ofèr azot pou é gran zétid, pou vni médsin, avoka, antropronèr, épi in zour artourn shé zot pou fé a fète dann z’ot péi.
I pé di sa, i pé invant in n’afèr konmsa, mé sa la pi z’ot listoir sa i apèl sinploman révizyonis.
Arzout èk sa, si i vé demoun dann l’avnir léspri sar pa kontaminé avèklistoir, sinploman anpèsh la kréasyon la MCUR-mé sa sé listoir sète-la, sa la pal o révizyonism.