Poitan kan zot la trap zot lindépandans bande zékspèr britanik l’avé pa promète azot in tro bon l’avnir. Antouléka lété sak Jean-Claude de Lestrac, in bon konéssèr la politik Maurice té i di kan li la vni an konféranss dsu Chagos issi La Rényon. Pou li, bande zanglé téi panss Maurice lété ménassé tou-koté é ké pou zot lo myé lété d’lèv zot kan alé.

Antouléka, sé sak zot la fé é san tro bien prépar Maurice pou lindépandans-la. Pli pir ni koné zordi bande zanglé la vyole lo droi dsi la dékolonizassion vi ké zot la garde in dèrnyé koloni dann l’ardhipèl Chagos : néna poin lontan, konm ni koné Tribinal La Haye épi l’onu la kondane l’Anglétèr pou sa é pou sa néna bonpé péi afrikin la dévir azot lo do.

Kossa nou néna pou dir apré 55 zané d’lindépandanss sé ké lindépandanss Maurice lé a pépré réisssi. Li la modèrnizé é lo péi lé paré pou assir son bande zabitan d’ète a pépré ézé é zot la fé sa avèk zot prope fors d’apré mwin… Antanssyon mi di pa toulmoune lé kontan, mé mi di toulmoune lé fyèr é in pèp fyèr sé kante mèm inn réissite — par rapor a nou rényoné pa assé fyèr solon mon gou…

Astèr ni pé pèrmète anou dir dë mo dsu larchipèl chagos. Yèr zistoman Olivier Bancoult lété issi La Rényon é li té apré di son santiman dsu lindépandanss Maurice par rapor son péi natal — Chagos — par rapor son pèp, lo pèp chagossien. Donk li téi di si lo zour lindépandanss Maurice sé in gran zour pou Maurice, sé pa in gran zour pou li pars sé zour-la la komanss lo gran malèr, la grande soufranss, pou lo pèp chagossien.

Noute zoinal k’i anparl souvan Chagos k’i rossoi Olivier é bande chagossien konm i bande frèr é sèr dopi lontan i konpran sak olivier i panss é la bléssure tout bande déporté chagos i i porte dan zot. Konm Philippe Sands i di dann son dèrnyé liv — La dernière colonie — kan lisbie Elizé la pass témoin laba La Haye nou va antande ankor lontan lo brui dé larm. Sète-la la pankor fini arété.

A bon antandèr, salu.

Justin