Oté

Lo 26 Mé, nou vot pou Ian Brossat ék Julie Pontalba. Alon di partou !

Pol / 27 avril 2019

JPEG - 43.6 ko

Dann in mwa, lo 26 Mé, sé zéléksyon éropéinn. Néna karantan sétané, nou la vot promyé fwa pou parlman lérop. Sété lo 10 zyin 1979. In zéleksyon, ék Paul Vergès, la mark in tournan dann Listwar la Rényon ék Lérop.
Pou byin konpran, innti rapél : nou lé donk an 79, Giscard d’Estaing lé Présidan la Répiblik, koté li, lo promyé minis, Raymond Barre. Isi, la Rényon, an parmi lé trwa dépité, nou néna Jean Fontaine ék Michel Debré, dé gran modél de démokrati ! Mé pa ryinksa, koté l’ORTF barashwa, néna osi Vincent Dolor ! Lo total ék lo kapital ! Initil dir azot koman kominis lé trété, li lé konsidéré konm lo dyab. PCR, Paul Vergès na pwin drwa koz dann radyo, ni pass dann télé Debré.

Epi, alala ! Kouran Avril ou débi Mé, lo nouvél i tonm : Paul Vergès lé kandida d’si la lis zéropéinn PCF ék Georges Marchais, an 4e plas. La drwat Debré ék l’ORTF i transpir syèr frwad, kominis ék démokrat i wa, an kontrèr, in léspwar pou lo pép Rényoné. Nou lé zédi 31 Mé 79, dann télé an Frans, difizé par obligasyon isi la Rényon, Paul Vergès i rakont koman li la fé plis 10 mil kilomét pou koz dé minit, télé laba, akoz dann son péi, la Rénion, li lé interdi ! Lo vérité, lo skandal, i pét o gran zour. Sé lo promyé fwa osi, Rényoné i wa, i antan Paul Vergès dann télé !

Lo 10 zyin, lo list PCF-PCR lé an tèt la Rényon, ansanm lo rézilta la Frans, Paul Vergès lé éli dépité éropéin. Sé lo pwin d’dépar din zistwar politik ant la Rényon é Lérop , ék rokonésans lo spésifisité nout péi, avék lo travay fé par Paul, é rokoni par toul moun, zordi ankor. Episa, ropri par Elie Hoarau, answit.
40 tan aprè zéléksyon Paul Vergès, listwar i vé k’zordi Julie Pontalba lé 6e d’si lo lis éropéinn PCF ék Ian Brossat, pou kontinyé lo konba nout kamarad é pou fé avans la Rényon. Alon ansanm donn a él in kou d’min. Alon di partou !

Pol



Inn modékri, inn ti lavi, inn komantèr ?



Bann modékri andann forom






  • Nou krèol la sot la mèr ni oubli pa not péi. Not toute nou vot lo 26 Mé , nou vot pour Ian BROSSAT ék Julie PONTALBA. Dimanche na artrouv’ a nou dan FOIRE DE PARIS. Nana un chié boutik kréol .
    Alo ! Alo ! Calixte oubli pa dimanche na artrouv a nou Foire de Paris. Na koz un peu politik ? Na koz un pé Julie PONTALBA . Sa lé un fanm sir.Julie sa lé un fanm kom nou . Un kréol mèm. Un fanm péi.
    Kont su ou .Oubli pa appel band kamarades Mimose, Céline, Madeleine ansam zot bonom . Mi appel Serge, Max, Jean Pierre ansam zot fanm é band marmaille.
    Na artrouv et oubli pa " La victoire est pour Julie"

    Article
    Inn modékri, inn ti lavi, inn komantèr ?