Somanké koudazar, zéléksyon la i pé èt la klé pou rouv nout domin ? Kan mi di nout domin, boudikont sat nout tout, boudikont domin nout péi. Déza, nout kandida pou “In rényon nouvèl“ néna in gran lanbisyon pou propoz in dévlopman d’si vin tan. Oila poukoué, ni sar vot lo dimansh 6 désanm pou lavnir nout zanfan, nout ti zanfan, tousala. Oila poukoué, ni dwa vot pou pa argrété, pou pa gingn la bil lo landomin zéléksyon.

Lé vré, sanm pou mwin nou lé dann in tournan, zéléksyon la lé inportan pou nou, pou nou zordi, lo moman lé la pou anparl kèl dévlopman pou nout lékonomi solidèr pou domin, pou anparl, kèl transpor pou domin ? Kèl formasyon pou bann jèn ? Koman ni sar mont la kaz pou domoun ? Koué ni fé pou nout par dan la zonn ? koman ni vwayaz domin, dann bis poliant ousinonsa, dann loto prop. I bèss lo pri lavyon ousinonsa i pèy domoun pou vwayazé konm zordi.

D’si léta nout planèt ? Dann kèl éta ni sar lèss nout planèt pou nout bann zanfan ? Pou tousala nout kandida néna la répons. Sépousa li di la vérité, i gingn arpa fé tousala dann 6 zan, sépousa li provwa fé si vin tan.I rèt tré pé zour pou alé war la popilasyon, konm sa minm ansanm na prépar nout domin, ansanm na vot pou l’avnir nout bann zanfan, boudikont lo 6 ni vot pou domin.