Si mi rapèl bien La Rényon lété déza départman franssé dann tan-la. Normalman bande loi sosyal noré du komanss apliké alor pou kossa mon bande ti kamarade lékol té i soufèr la fain konmsa… So matin mwin té apré anparl sa avèk l’ékrivain Axel Gauvin é li la rapèl amwin lo dé médikaman mon momon diréktrsiss lékol l’avé pou ziguile la fain bande marmaye lékol kan té i tonb féblèss :

Inn lété in domi-vèr lo dsèl pou fé bate aryèr lo vèr – askariss – té apré monté. Dë lété in morso d’pain ashté la boutik Hong Hune dsu noute karné pars lo vré maladi té la fain.

Mwin lété katéshiss zédi épi dimansh léglize sinte-Clotilde é mwin té i oi déssèrtin marmaye, toultan lo même, bande fiye sirtou, apré tonb féblèss dann ban katéshiss. Mwin té i tonb pa fèb pars mwin l’avé gouté la kaz gran-mère, bande garsson l’avé manj in vante gouyav, mang épi d’ote ravaze. Sak té i tonb fèb lété bane fiye. Pars dèrnyé ropa lété sète la kantine mèrkrodi onzèr sansa samdi – gouté lo matin ni anparl mèm pa.

Mi rapèl la kolère mon papa : li lété konm li di furibar oir demoune son vilaze mizère konmsa. Nou lété départman franssé é touzour poin d’zalokassion, in salère la mizère pou lo papa sansa pou la momon é in vante ki kriye, ki kriye avèk l’èr téi balade dann lo bnde boiyo.

Noré a dir dsi l’tan-la, noré a roproshé, noré a rakonté dsi la zénérozité bande kapitalist épi bande kolonyaliste. Noré a dir dsi la kolère mon papa kan lo mèr téi fé monte sokour pou sak té pa konu konm kominis é mon famiye téi sokour konm zot téi gingn bande famiye kominis. Souvan défo la nuite pou lo mèr pa ète o kouran.

Sa même téi apèl dyab kominiss é mi shanj pa arien konte in kalifikatif konmsa.