Mé syé, Médam, La sosyété mi vé rakont azot in zistoir vré. Sa téi éspass dann bann zané sinkant. Dann tan-la gramoun Félix lété konséyé minisipal kominis, é son madam diréktris lékol. Lo mèr in gran bononm la tète an koko fromaz téi fé tout son posib pou lèss lékol mon péi d’nésans dann l’abandon. Lo toi téi koul, lo bann ban té kass-kasé, défoi mèm pou donn manzé bann marmaye la kantine téi falé mésyé félix téi pran dann son mayi pèrsonèl, son grin pèrsonèl, défoi mèm konsèrv li téi pran dsi son karné d’boutik-la boutik Mong Hine par l’fète.

Kan ou lé marmaye zot i koné sa sé in kékshoz i mark aou, épi dann out ti kèr marmaye ou ramas la kolèr, ou i ramas la rankine pars sak i fé out momon sansa out papa lété konmsi k’i fé aou - lo zo i soutien la shèr zot i kroi pa ?.. Donk, in zour lo mèr i désid rann vizite lo lékol son pir zènmi-lé vré moin la obli dir azot, Gramoun Félix lété in pé lintandan bénévol dann lékol la, li lété mèm in pé konséyé pédagozik mé mi pans n ou va anparl sa. Donk in gran l’aprémidi lo mèr an késtyon l’arivé sourir an transh papaye lo sikré pou lo bann zélèv épi berlingo, plizyèr bokal.

Zot i koné dann tan berlingo-la sa téi manz pa souvan é tout marmaye la sote la dsi konm goulipia. Tout, sof inn, in garson Félix épi son madam, li vé pa pran lo berlingo. Son momon i priyèr ali, i di ali : « Pran inn mon zanfan sa lé bon sa ! ». Mé arien pou fé, li vé pa, dayèr li yèm pa sa. Lo mèr i rogard in pé étoné é dan son kèr li di pétète lo marmaye néna in tour d’vant sansa kékshoz konmsa.. Anfin la vi i suiv son kour, mé oila k’i mank berlingo-sirman in mal konté ! Donk Gramoun Félix i anvoye madam Baba-in kantinyèz - la boutik pou pran lo sirpli dsi son karné d’boutik ? Bien kontan fé in tour son mèr-énmi.

Ala berlingo i ariv so kou isi péyé dann la posh Félix-berlingo kominis si zot i vé bien. Madam Félix i di avèk son garson alé pran in bonbon pou li son kaz. Non ! Li di, sète-la mi vé é ala ké li pran son dé-troi so kou isi. Zorèye lo mèr la vni rouz ! Gramoun Félix la kraz in sourir dsi son koinn lèv, é lo marmaye sé d’ manz son berlingo san traka, san konplèks-son famiy la pèye sa !.. Zordi zélékstyon i ariv é néna bonpé kandida. Mi yèmré zot i pran modèl dsi Gramoun Félix, son madam épi son zanfan, sète téi manz pa berlingo lo mèr. In bann moun a prinsip – sa lé sir !