Na in pé i di konm sa, l’Erop sa in n’afèr inportan pou bann RUP, donk, vi k’La Rénion sé in RUP, l’Erop lé inportan pou La Rénion. Mé lé rar k’i di bien pou kosa lé inportan. Si tèlman ké na in pé i di, l’Erop-la, sa in n’afèr konpliké, kaziman in l’izine-a-gaz, é si tèlman konpliké k’i fo pa domann azot kouk i ansèrv pou vréman. I komans èt danzéré kan lo sitoiyin konm zot, konm moin i di li konpran pa gran-shoz dan l’Erop. Sirtou ké, lé vré, l’Erop i zoué in gran rol dan nout vi ékonomik sosial, dan la politik, la solidarité, l’anvironman...

Mé kan ou i konpran pa gran-shoz dan in n’afèr, ou i ékout radio, ou i rogard télé, ou i lir zournal, é normalman, ou i trouv inn-dé bout l’ésplikasion. I pé dir osi, na in gouvèrnman, é dann gouvèrnman na in minis bann z’Afèr éropéène. Nana osi in minis bann péi l’Outre-mèr. Donk, demoun pou éspliké normalman i mank pa. L’èr-la, lo sitoiyin i doi èt ékléré. Li doi konprann in pé tout z’afèr la politik éropéène. Li doi bien konprann kan lé shoz i roul ron, é kan i roul pa ron.

In vié gramoun té i di, ron konm in boul karé dsi in tab plat. Toulmoun i koné l’Erop lé dan la kriz é toulmoun i antan bann gran péi épi la Komision éropéène lé pa tro dakor dsi lo bidzé l’Erop. I paré la Frans i vé pa i toush la PAC (Politik agrikol komine), l’Anglétèr i vé i rovèrs ali l’arzan, solon li, li la vèrs an plis. La komision éropéène i domann k’i koup transh dann bidjé... zot i pans sa i sa pa fé anou arien sa ? Zot i pans i toush ar pa nou ? Kroi toujour, mé fié pa tro pars nana danzé i ménas anou.

Dopi in bon koup de tan, Younous Omarjee, dépité éropéin, i fé konférans de pres, i ékri dann zournal pou di sak nou lé riskab sibir, i sava koz èk Jean-Yves Minatchy, i fé konférans de près, mé i diré sa i inkièt pa tro d’moun. Konm di lo kont, sé konm si i souf dann violon pou tir in son.

NB : In pé i di osi, pis dann violon pou tir in son.

 Justin