Oté

« Lo bien an abondanss i fé pa d’tor son moun »

In kozman pou la route

Justin / 10 avril 2021

JPEG - 43.6 ko

Méssyé, Médame, la sosyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami néna in kozman dann fransé i di konmsa : « Abondance de biens ne nuit pas ! » donk sak mwin la mark an-o la épi lo kozman fransé, lé dé sé l’mèm zafèr. Antouléka mi kroi ! Toute fasson i vo myé fé anvi ké pityé. Mwin pèrsonèl si mwin l’avé lo shoi rante « fèr anvi » é » « pityé » sèryèzman san molir mi shoizi promyé solissyon. Lé domaz shoizi pars solon mon poinnvizé é si mi ékoute mon fon d’kèr mi préfèr-ré ni inn, ni l’ote pars mi profèr pèrsone i porte pa antansyon dsi mwin é pou sa mi atir pa l’atansyon. Mi profère ète transparan, plito ké tro vi. Mé si néna poin lo shoi, donk si mwin lé blijé shoizir, mi souète pa fèr pityé. Fèr pityé, sé pèrde son fyèrté, sé diminyé son valèr, sé d’ète rabéssé, é ala kékshoz i bote pa mwin pou vréman. Alé ! An atandan mi kite azot rofléshi la dsi é ni artrouv pli d’ van. Sipétadyé !