Biensir sa sé in n’afèr k’i trète. Sa i apèl l’ignifugassion, in trètman i pèrmète protèze la paye kont dofé. Mi rapèl kan Elie Hoarau lété mèr Sin-Pyèr, a lokazyon d’in 20 désanm la fé in vilaze maron é la trète lo bande kaze pou anpèsh brilé.

Anpèsh brilé ?

Sa i doizète valab ossi pou lo boi kan i ansèrv dann batiman é mwin la touzour poze amwin késtyon : lo trèltman konte dofé sa lé obligatoir sa ? Pou mwin sa sé in n’afèr obligatoir sa ! Mé oila, la loi i suiv loin dèyèr la nésséssité é in loi l’ané 2020 la roganize sa.

Sirman pars i dévé an avoir in lobby déyèr sa, é sa la mète lo tan pou sorti.

… Poitan néna in bon pé limèb issi néna bande protéksyon an boi é i sèrv pou abèss in pé la tanpératir. Mé oila konte dofé ziska zordi néna trètman konte zinsèkt, mé pa konte linsandi.

Antanssyon mi vé pa dir mi koné pou kossa limèb kamélia la brilé, ni ké noré pa brilé si l’avé aplik la loi 2020 avan lo tan, mé mi panss in linsandi konmsa i domande pran prékossion pou l’avnir. Gouvèrné sé prévoir é prévoir lé bien nésséssèr par lo tan k’i kour.