Mézami i parétré d’lo ni boir issi La Rényon lé pa katogan ? I parétré mèm landroi wi kroi dolo lé prope, landroi li lé kaziman transparan, ébin néna kalité koshoneri la-dan i fo évite di sa dovan l’moune kan l’apré manjé… Romarke bien mi fé ké rodi sak mi antann dann bande radyo pèrkal é mwin la poin la prèv a konvikssyon, mé sak i di lé pa angajan… I paré dann sèrtin landroi l’moune i boir d’lo i koul dann robiné, néna dé foi bande marmaye i gingn mo d’vante doktèr i pé pa éspliké ziska k’lo zour inn an parmi la domande pou analize dolo in marmaye la boire é l’èr-la, sirpriz – sirprize la trouv dann lo déssèrtènn molékil kaka.

Si tèlman sa téi fé tonbe demoune malade.

Biensir, zot la romarké, mwin la pa parl landroi dolo i koul maron pars sanbe pou mwin lé in pé égzazéré kan i di i sifi fé bouye dolo troi minite pou boir ali ? Pars mi panss pa troi minite é lo lé blan. Mi panss mèm pa bande partikil solide an sispanssyon i fonde dann lo bouyante. Fransh vérité, mi kalkil l’apré fé boire demoune la salté an dizan wi pé anvoye ali déyèr la kravate é wi risk pa arien.

Mézami, mwin la antande dir dan vin-troi komine dsi vinn-kate néna shé nou, lo i prézante pa la kalité i égzij nivo l’Érope é pou trape sa néna ankor d’lo-éskize mon pardon-pou koul dsou lo pon... Si tèlman dann déssèrtènn komine in pé la fine déssidé fé lizine pou potabiliz dolo. Sa i koute dé mil é dé san, dé million-karante million pou sète Madurand Sin-lé… Biensir i sava astik lo-la avèk produi shimik, épi bande manipilassion mékanik, é si mi tronpe pa fé in rézo éspésyal pou amenn lo prope ziska robiné. Nou lé mal parti pars i sava pa-d’apré mwin-mète lo prop dann sirkui pou kabiné, pou mashine a lavé, pou aroze zardin é in kantité lizaz i domande pa lo lé potabe ? Amwins ké sé konmsa k’in pé i vé fé.

L’èr-la mwin té apré panssé, pou kossa i fé pa konm laba la vil New-York : laba la déside rande prope lanvironeman épi zot néna san produi shimik lo lo pli pure ké néna dann lo monde. Mé zot i oi inpé kossa i fo fé arienk pou l’aproptaze lanvironeman. Mi oze mèm pa di for pars mi antrovoi déza in pé apré trape zot gran kouto kan i di zafèr konmsa... Mé mi fé konfyanss bande léktèr Témoignages pou konprande sak mi di rante bande lign… Kan mwin lété pti Boi d’Nèf Sin-dni l’avé in fontène, é té la nou téi sar trape dolo pou boire ; sa té fré, sa té bon, sa téi rodone aou la santé. Fontène dolo-la lété koté la kaze madame Toutou é sa té noute lo d’dimansh pars otroman nou téi trape dolo dan la kour lékol... mézami madame Toutou la fine pass koté d’tanto, é lo fontène néna lontan lé fine détrui, mé mi panss ankor so lo-la an dizan : « éya ! lé vré bande bone shoze néna touzour inn fin ! »