Mésyé, Médam, La Sosyété, koz èk moin sé koz èk in kouyon, mé sé o pyé d’lo mir k’i oi lo mason. Mé zami, shakinn néna labitid viv avèk son l’anvironeman é la plipar d’tan sa lé la avan ou, é mi oi pa pou kosa i fo shanj lé shoz d’apré ou. In pé i fé prosé pars kok i shant tro bonèr. D’ot i vé fé arète la klosh. D’ot ankor la rolijyon lé zot i fatig zot tété. Ni oi bien sa sé in manyèr pansé i pé pa ariv in bon rézilta sof si ou i kroi ou sé l’méyèr, lo pli for, lo pli apiyé mé i ariv souvan dé foi, out l’anvi i kass par bout é sak ou i pans ou i sava trapé i shap dann out min. I fo pa alé kont la kiltir d’moun, ni kont zot patrimoine pars konmsa mèm dispite i komans é dé foi ou i koné koman la komansé é ou i koné pa koman va fé pou fé arété. Alé ! Mi kite azot rofléshi la dsi é ni artrouv pli d’van. Sipétadyé.