Médame zé méssyé, la sosyété koze èk mwin sé koze èk in kouyon, mé sé o pyé d’lo mir k’i oi lo vré masson.

Mézami konm zot i oi ni kontinyé noute bate-karé dann karo provèrb lo gran péi kréol i apèl Haïti. Si mi di azot provèrb-la sa i égziss in pti pé dann toute péi é la plipar d’tan i ansèrv pou gaspiye bande anprofitère, bande zabizèr, toute so bande i mank pa kissoi dann déssèrtin kartyé, kissoi dann lékol. Mé kozman-la i fé panss amwin kékshoz mon papa la rakonte amwin dann tan li téi sava dann in pti lékol boi-d’nèf. Li la rante lékol uitan passé é dann lékol-la l’avé in l’anprofitèr konm dé zist la désside gaspiye ali promyé zour la rantré mé mon papa lété pa in zanfan pou lèss ali fère é li la prépar ali pou rande kou pou kou, é kan lé zote marmaye la vi inn téi tienbo tète avèk lo labizèr, toute la rante dann ron é lo fyèr-a-bra la gingn inn volé promyé foi dann son vi.

Alé ! mi kite azot rofléshi dsi kozman-la é ni artrouv pli d’van. Sipétadyé.