« Lo dan lé bète ! »

Moin lé sirésèrtin zot i sava pans kozman moin la mark an-o la i gingn pa kass lo kate pate in kanar. Moin lé mèm sir in pé rant zot va pans sa sé in réaksyon bète in moun néna pou éskiz ali. Pou kosa mi di sa ? Pars, konm zot i koné désèrtin moun kan ou i ri i kalkil ou l’apré foute z’ot tète. Défoi, moin osi mi pans konmsa ! La déza ariv amoin touléka é moin la fine mèm pran la moush po in n’afèr sirman téi vo pa la pène. An touléka, kan ou i ri, ou i amontr out bann domino lo dan é aprésa si ou I oi out réaksyon té maltapropo, ou I éskiz aou, an dizan : lo dan lé bête ! Sansa la boush lé bète ! Mé a bien kalkilé shak moun néna son réaksyon é isi La Rényon bann réaksyon lé souvan dé foi an foutan. Sé pou sa mi invite azot méfyé pars lé sirprénan mé lé vré, i ariv ou i pé provok shé in moun in réaksyon ou i vé pa ; ou i pé vèks ali, pou in néstan sansa pou in bon koup de tan. Koman ratrap sa apré ? Pèrsonèlman moin la poin la klé. Alé ! Mi kite azot pou rofléshi la dsi é ni artrouv pli d’van. Sipétadyé !