Lo dézèr l’atakama, in gran tapi fléri é léstrésité solèr gratuit : la prèv ké nout parti i koz pa la boush rouvèr !

12 zwiyé 2016, sanm Justin

Zot i koné Lo Chili ? Sa moin lé sir kansréti pars lo péi nana in bon l’ékip foutbol. Zot i koné lo dézèr l’Atakama ? Lé pa sir. Touléka mi pé dir azot son sipèrfisi sa lé gran vèy pa : mi sort lir li fé plis désan mil km-karé.

Pou kosa mi parl azot de sa ? Dabor pou dir azot sa sé in dézèr an parmi sak lé pli sèk : dann in l’androi la tonm dé milimèt la plui dsi in pèryod trant-an. Dézyèm z’afèr pars la fé in l’épizod El-ninio la aroz lo dézèr é konm bann grin flèr, bann rizome té i dor trankilman zot la révèy d’in kou é lo dézèr la kouvèr avèk in kantité milyon flèr plis dé san kalité é tout koulèr-lé zoli a rogardé an foto !

Mé la pa arienk pou sa pars figire azot nana si tèlmann solèy ké lo péi i sort fé vinn-nèf santral solèr, é nana ankor kinz prozé lé déza paré dann karton. Si tèlman ké lo nor lo péi i sort gingn san katrovin douz zour kouran gratuit. In bon nouvèl ? Pou lo bann z’abitan, sa lé sir, mé pou bann gran vil konm Santiago lo pari la pankor gagné, pars i mank ziska zordi lo rézo pou amenn kouran in pé partou ousa k’i fo.

Arzout èk sa gratuit la pa in bi, pars i fo kant mèm an avoir l’arzan pou l’ antrotien lo matèryèl é pou ronouvèl ali kan k’i fo. Mé i fo sirtou signal ké sak la désid invèsti lo plis posib dann l’énèrzi ronouvlab.

Sé dir osi ké kan nout parti kominis i parl l’otonomi énèrzétik pou nou, li koz pa la boush rouvèr.

Energies renouvelables Padport Parti communiste réunionnais PCR

Signaler un contenu

Inn modékri, inn ti lavi, inn komantèr ?

Bann modékri andann forom

12 zwiyé 2016, 12:47, sanm Ti-Louis

Mersi Zistin,

Tout’ out kozman lé bon pou mwin. Sof in afèr desi lokèl in paké dtan mwin té dakor samb-ou aforstan nout lédukasion la format’ anou.

Transpor lénerzi ziska zordi sa lé in gaspi ke lé pa kroyab. Oplis ou transport ali oplis ou perd lénerzi. Sa lé in pé parey pour transpor do lo. Par isi, kanal lé pété, par laba lé fisuré, etc, etc, la ké lo ra, boudikont, oplis lo parkour lé long’ oplis ou sava zèt lo prop dan somin.

Pou létrisité lé plis pir ankor : tout lo long lo kab pou transport’ lénerzi, santimèt par santimèt nou perd’ in paké lénerzi. Oplis ou transport’ oplis ou perd’ali.

Sé par rapport’ asa in bon pé léspèr i di-anou ifo sanz nout mantalité : santral solèr, santral éoliyèn, santral zéotérmik, santral biomass, etc, ifo rapros ali oplis posib la plas ousa ousava itiliz lénerzi.

Asé èk lo maniyr pansé grogro lindistrièl : rapros touzour plis la plas prodiksion samb’ la plas itilizasion.

Ifo osi arèt èk so labitid in sèl sours lénerzi. Zordi domoun i domann in "mix énerzétik". Komsa si soley pou kasièt in koup’ do tan, sora posib itiliz la briz, fermantsion tout’ kalité zerbaz, ti morso lo bwa i anserv pariyin , etc.

Alon nétoy’ nout koko tout’ zidé la “sivilizasion” lo gaspi la donn’ anou labitid.

Mersi pou out kozman i fé rapèl anou tout’ dopi 1975, la pa iyèr, PCR la obliz anou réflési desi tout’ kalité nouvèl lénerzi inépuizab’ i fépa la polision, i obliz pa tir in mwatiyé miliar éro lané dan lo bertèl La Réniyon.
Ti-Lwi