Sa in drol z’afèr sa ! Moin mèm lé a d’mandé kosa sa i vé bien dir ozis. Solman moin la romarké kan i di sa dsi in moun sé in moun mèg vèy pa. Li manz, mé li vien pa portan konmsi son manzé i profite pa li. Mi pans zot osi zot i koné domoun konmsa : oplis li manz, oplis li afayi. Oplis li manz, oplis li vien konm in éskélète. I diré li nana lo vèr solitèr. Sé pou sa i di lo dyab i manz son manzé. Moin la antann in zour in moun dir, sé pa dyabète i mégri ali, sé lo dyab dsi li ! Kosa zot i anpans zot ? Arien ditou ? Fé travay z’ot koko ! Fé bouy z’ot matyèr griz ! Zot va oir, ké rant-rant, ni pé z’ète, tazantan, dakor rantre nou.