Mi fé in rèv, souvan défoi, in drol de rèv pars, fransh vérité, na poin in loi natirèl, na poin in loi sosyal, mèm in loi Bondyé pou anons in n’afèr konm sa. Mi rèv, bann zénérasyon koméla i sava pli loin ké bann z’ansien zénérasyon, épi bann nouvo zénérasyon i dépas azot ankor pou port l’afèr zot tour... konm in suit san fin. Biensir, sa in rèv, solman in bon rèv... Antansion, la pa pou tras in plan dsi la komèt, la pa pou poz in gran késtyon filozofik, mé pou poz in sinp késtyon. Dizon in késtyon i konsèrn nout péi épi nout pèp.

Mi pans moin la fine ékri, in zour, moin la koz avèk in gran konésèr la lang kréol, é lo boug la di amoin, li pans kréol va viv ankor inn-dé zénérasyon épi va disparèt. Moin té jène-jan dann tan-la, é lo moun té i doi kit La Rényon an viktime la réprésyon kolonyal, épi moin la di dan moin-mèm, in n’afèr konm sa i ariv ar pa si nout pèp i vé pa, é si in maksimom kréol i fé sak i fo pou anpèsh in katastrof konm sa arivé. Lo tan la pasé é mi oi nout lang kréol lé bien vivan... pa par moin, mé par lénèrzi nana dan nout pèp rényoné. Tout fason, sa lé pa vré arienk pou kréol rényoné, sa lé vré galman pou kréol séséloi épi kréol morisien, épi d’ot ankor.

Shakinn i doi fé sak li pé pou mèt nout kréol anlèr. Sa lé vré pou bann shantèr séga épi maloya. Sa lé vré pou bann rapèr kréol. Sa lé vré pou dmoun i rakont zistoir, bann fézèr fonnkèr, bann amontrèr dan lékol i shoizi an l’opsyon amontr nout lang bann marmay. Sa lé vré osi pou bann kasèr la blag dann bordaz shomin. Sa lé vré pou bann shèrchèr i travay dsi la lang, i étidyé la gramèr, i fé bann mo.

Sa lé vré kan désèrtin i tradui bann tèks. Par égzanp, kan in lékip marmay Sin-Pol èk zot profésèr i désid mèt an kréol in tèks ofisyèl konm lo droi bann zanfan pou la Zourné internasyonal bann zanfan. Bravo pou zot ! Zot i fé avans la koz bann zanfan épi la koz nout kréol.

NB : Sa in n’afèr moin la vi dann télé é moin la pans bann marmay-la lé jényal pou vréman.

Justin