Mi koné pa si zot la fine fé la romark, mé na d’moun mèg - pa tout bien sir ! - i manz in bonpé mé i rés mèg mèm. Pou lo kréol sa sé in n’afèr la pa normal ditou. Li pans pa lo vèr solitèr ! li pans pa non pli in malformasyon zénétik ! Li pans pa in maladi natirèl !

Li pans na in n’afèr la pa katolik la-dan é ki di pa katolik, di ké lo dyab i mète la min la dan. Myé ksa : si lo kiyèr i rant dann la boush lo moun, si sé li k’i vid lo zasyète, mé na in détournman kék par. In pé i di, sa l’éspri ! In pé i di sa sé lo dyab li mèm k’i profite lo manjé.

Kosa zot i anpans zot ? Arien ditou ! Moin pou mon par, dsi lé z’antro fète, mi fèrm mon také. Nou va rotrouvé !