Mi sipoz zot i koné kosa i lé in fizib ? Sa nana in pé dan tout mashine. Nana dan la kaz pou anpèsh kour-sirkui. Donkalor, li lé bien itil pou anpèsh in n’afèr pli grav arivé. Mé na poin arienk dann mashine nana sa. I prétan dir, dan la mafia, na in pé i ansèrv de sa. Koman ? Lé sinp, zot lé la pou anpèsh la polis alé pli o, alé ziska lo shèf. Ziska lo parin, bou di kont. Dan désèrtin gouvèrnman, Promyé minis i ansèrv de sa : sé li k’i sote kan la popilarité lo prézidan lé ménasé. Na défoi lo prézidan, la shoviy lé si tèlman gonflé ké li pran pa prékosyon protèz ali déyèr son Promyé minis. Li pans li la pa bézoin fizib. Sanm pou moin, prézidan Sarko lé konmsa.

An parlann prézidan Sarko, nana in bon koup de tan, in n’afèr séryé l’apré kour déyèr li, san trap ali ziska zordi. Sa la pa in n’afèr l’ariv yèr, sa i romont dann tan nout ti prézidan té in gran siportèr lo kandida Balladur. Si mi tronp pa, i apèl sa Karachi-gate. La Frans la vann sou-marin lo Pakistan é l’avé in zé d’komisyon, i apèl mèm sa rétro-komisyon. L’afèr la maltourné vi k’Balladur la pèrde z’éléksyon, é Chirac, li la tras in kroi dési lo rétro-komisyon. Bann mafia té doi bénéfisyé sa, lété si tèlman bandé ké zot la roganiz in l’atanta la-ba dann Karachi, l’ané 2001, é in bonpé Fransé inzényèr épi téknisien lé mor dan so z’afèr-la. Dépi tan-la, na in ziz i fé son l’ankète. Gouvèrnman i poz ali lanspèk par dsi lanspèk, mé son travay i avans kant mèm. Si tèlman ké dé dalon prézidan i sort ète mi an l’égzamin. Bon fizib, mové fizib ? Na oir la suit, pars si la pa in bon, sak lété par dési zot lé riskab ète an danzé. Kisa lété dési d’apré zot ? Dovine in pé zot mèm ! Touléka, dann alé l’Élizé, in pé la pa trankil ; La prèv ? I sort fé i kominiké, mi rakont pa zot ; dizon lé ékri èk l’aside ; La plime la tranp dann vitriol !
Nou va oir la suit listoir, mé sak lé sir, dan so késtyonn fizib, konm di lo kont, i fo mète lo fizib k’i fo, l’androi k’i konvien ; Sansa tansyon pangar !

NB : Dann in marshé, nana souvan défoi in l’intèrmédyèr. I fo vèrs ali in komisyon pou son travay. Défoi, i vèrs ali in tro for komisyon pou li arvir in bon moné pou lo vandèr. Sa lé défandi fèr, sa lé pa legal, é i diré sé sak in pé la fé kan la vann sou-marin lo Pakistan. Lo larzan noré ansèrv pou la kanpagn Balladur.

Justin