Mon granmèr la pass l’ote koté la vi l’ané 1960 é dann tan-la mi diré demoune lété kant mèm in pé frugal. Koméla la shanjé pars koméla i rode lo méyèr produi épi lo méyèr transformassion pou alé — sanm pou mwin — an dirékssion la souvrèneté alimantèr. Mi profèr k’i di lotosifizanss alimantèr — i di ossi lotonomi — pars pou nou toussèl konm ni lé dann milyé losséan indien, avèk lo gou nou néna épi déssèrtènn difikilté ranpli par nou mèm noute boujaron avèk dé shoz bon pou la boush, pou la santé, pé s’fèr pou lo porte moné hmm ! Hmm ! Lé pa défandi viz lo pli o possib.

Mézami mwin la fine anparl azot bann zémission i anparl bann produi bon kalité natirelman, transformé an produi bone kalité épi déstinassion la konsomassion intéryèr, konm ékstèryèr déor sak i rode arienk lo bon pou manzé é pa solman la kantité mé la kalité… O fète ! Mi sorte antann laba dann la foir agrikol Paris bann zékspozan rényoné la gingn in paké pri d’onèr ; sinkante médaye é an parmi vinnsink médaye an or. Mi doi dir azot sa sé kékshoz i bote amwin mèm si mwin lé pa ala roshèrch bann produ gou péi. Mi dovré si mwin lé patriyote ékonomik.

Astèr, pou mwin sa sé kékshoz k’i anonss lo dévlopman bann prodikssion bon kalité épi bann transformasion d’kalité galman. Mi rapèl in zour Paul Vergès té apré anparl anou bann produi rényoné, zot kalité, épi zot kantité pars lotosifizanss sé produir lo maksimome ké ni pé bann podui d’kalité an mèm tan d’ète valab pou lésportassion. In foi anplass mwin la konsidèr kamarade Paul l’avé rézon pou vréman-li l’avé in vizyon d’ote la poin !

A bon antandèr salu !

Justin