Alo ! Kissa sa in ? Sa moin sa. A bon ! Sa ou sa alor ? Oté, i paré ou i sava sote la mèr ? Amène inn-dé trik pou moin… kamèm pa bokou, i fé aryin... Ala k’lo boug i sorte amoin in list zafèr, gran konm sak son madanm kan i anvoy ali fé komissyon finn moi. Boukané li ! Sosis li ! Boudin li ! Kafé vaniy li ! Konfitir papaye, konfitir banane ! Brède manyok mouli… étsétéra-étsétéra-la ké lo ra. Bonbon do myèl ! Bonbon kravate ! Bonbon la rouroute ! Tizane la yapana, janrobèr, safran, konflor. Ala lo frui éstèr, ala bann ravaz (bann rasine) i vyin son tour.
Mi koup son konvèrsasyon, mé li la pankor fini. Ala k’li di : tèl shoz ou i ashté boutik malbar Sintandré, tèl shoz la Rivièr dé Pli, tèl shoz dann lo grann Éskor Sinni... patati-patata, ouati, ouatia.
Mi oz in késtyon. Mi domann ali si li sava rouv in boutik dan la Frans. Li réponn amoin, non. Mi oz ankor in romark dousman dousman, pars zot i koné, kréol lé in pé an sanzitiv sa, i vèks pou aryin... mi domann ali si son famiy lé gran koméla. Li réponn amoin, lé parèy minm.
Bin alor, mi arvir ali, pou kossa tousa z’afèr-la. Li répon amoin, sé pou artrouv in pé lo gou péi. A ! Lo gou péi ? Sa in n’afèr sa !

Justin