Poitan zot i koné kan dé zenn zan i bataye konmsa dabitid la poinn sogré pou pèrsone. Défoi sa téi ariv pou inn fiy : pars inn i koutiz la fiy é l’ot i voudré ossi fé in fyon sanm èl é par zalouzri i ariv a shoké. D’ot foi sé kérèl de famiy pou lo bien : in bien mal partazé, inn i pans li la poin la par k’i rovien ali, é li pans néna proférans dann la famiy. Alor i pé ariv a diskité, a dispité, a roul atèr an finnkont. Néna d’ot sé pou d’ot shoz rant demoun fashé pou kosa i koné pa : in sort ène i suiv bann famiy dopi dé zénérasyon édé zénérasyon. Mé sète foi isi, i koné pa pou kasa in ral kont konmsa l’arivé.

Lé vré demoun téi koné rant lé dé famiy l’avé kobm k’i diré dolo dann gaz-pou parlé an om modèrn. Mé konbienn foi néna dolo dann gaz rant dé famiy épi l’afèr i arète la san rotourn an aryèr, mé sana lé an avan non pli. Lé shoz téi agrav pa : demoun téi koné in famiy i koz pa avèk l’ot mé pa pliské sa. Té in pé drol oir bann zanfa n pa aksèp asiz inn koté l’ot, kisoi dsi l’ban katéshis, kisoi dann ban lékol. Mèmmoin la antansi dir in mésyé in pé rézonab la parti oir lo prètr pou domann k’i mète pa son pti zanfan koté d’in ot. Kan lo pèr la di pou kosa, li la réponn : « Sé pars nout dé famiy i koz pa ! ».

Lo Père la di ali toulmoun sé zanfan Bondyé donk pou Bondyé na poin arien d’shokan k’inn i asiz koté l’ot. Donk dimansh lo pèr la fé in prèshman dsi lo pardon é tout lo tranbloman épi inn famiy la tir son zanfan boi d’Nèf pou mète katéshis sint-klotid é l’ot zanfan la rèss Boi d’Nèf... La métrèss lékol la di èl i maye pa avèk sa pars èl lé layik épi èl i partaz pa bann rankine de kloshèr konmsa. Mé apré inn la parti dann milyé la klass é l’ot la vni dovan ziska k’i pass dann in ot klass é dan l’ot klass la éspass parèye.

Anfin konm mi di azot, dabitid épi dopi dé tan é dé tan, lé shoz i spass in pé konm sa, an pasifik, san ariv a gro bataye épi gro dispite... mé mi koz, mi koz, mi koz é sa i fé pa avans l’afèr é afors mi koz lé zafèr, mé ni arète tèrla pou zordi. Samdi proshin nou va oir la suite.

Dézyèm bout la fini mé lo zistoir lé pa tèrminé